Sylvia Falcón. Killa lluqsimun/ Cuando sale la luna / diskomanta Inkarioman. Pablo Landeo Muñoz

 

Sylvia Falcón. Killa lluqsimun[1] / Cuando sale la luna / diskomanta Inkarioman

 

Pablo Landeo Muñoz

Atuqpa Chupan

 

Pachamamapaq takikuna[2]

 

Maypachapipas takikunaqa runakunawan hukllayllasqam. Ñawpa suyunchikpa takikuyninkunaqa manam tiyaykuspa uyarinapaqchu karqa. Takinchikkunaqa kunanpachakamapas llamkaysiwanchikmi. Tarpuykunatapas, kawsaykuna hallmaytapas, mallkikunapa rurun pallaytapas, uywanchikkuna michiytapas yanapawanchikmi. Takinchikkunaqa rawraq ñankunapi purikuyninchiktapas utqayllachiqmi. Chayna kaspankupas ispañakuna chayamusqanku pachakunamantam takinchikkunaqa iglisiapa wañuy-kawsay qatikachasqan karqa; extirpación de idolatrías nisqanchikwan sapinmanta qulluchinankupaq. ‘Indiyukunaqa takinkuwanmi supaykunata, hintilkunatapas wakakunatapas muchanku’, nispam iwanhilisadurkunaqa runakunapa sunqunpi takikunata chutaykacharqaku. Paykunaqa, ñawsa kayninkuwan, yacharqakuchuqaya takinchikkuna ima llamkaypipas kallpachawaqninchik kasqankuta.

Kunanpachakunapiqa imaymanata ñakaristinpas ispañakunapa yawarninyan yawarninchikta tinkuykachispa kawsakuyta yachanchikñam; chaynallam takinchikkunapas, imaymana tukanakunawan tinkuchispam takikunchikpas: pinkylluwan, tinyawan, arpawan, violinwan, pianuwan, ima. Rayminchikkunapi Tayta Shantita, Mamacha Candelariata, tayta Santa Crusta yupaychaspapas yupaychanchiktaqmi tayta Quylluritita, pachamamanchikta, mallkikunata, ima.

     Sylvia Falcón paninchikpa Killa lluqsimunpi chunka kimsayuq takikuna uyariyqa pachamamanchikpa takikuyninta uyariymi, ayllunchikkunata yuyariymi, musuqmanta paqarispa yupinchikkunata huqariymi. Kay diskopim yuyayninchik panchirin ñawpa siminchikwan yupaychasqa. Sylvia FalconqaUniversidad San Marcospim yachapakurqa antropologiata, chaymi tayta-mamanpaq diskopi riqsipakuypipas nin: “a mis padres, sortilegio mágico de mi cultura, cuyo amor inexhausto habrá de platear por siempre el andar incansable de mi voz, río adentro, hacia el corazón perpetuo de la madre tierra”. Qawasqanchikpihina, takiqninchikqa riqsinmi takikuyninpa sapinta, ayllunkunapa yuyayninpi kawsasqanta; mayman takikuynin risqantapas. Chaymi payqa ñawpa runakunapa yuyaninta mana qunqanchu, aswan yupaychaykuspa llanllarichin tiqsimuyu pachapaq.

Pachamamapa mana puchukaq sunqunman takikunawan chayayqa tradición nisqanchikwan tinkuchispa rimaymi. Falcón paninchikpa takinkunaqa ñawpa yachaykunatam tinkuchin musuq yachaykunawan. Rimasqanchikmantam Octavio Paz nin: “Lo viejo de milenios también puede acceder a la modernidad: basta con que se presente como negación de la tradición y que nos proponga otra. Ungido por los mismos poderes polémicos que lo nuevo, lo antiquísimo no es un pasado: es un comienzo. La pasión contradictoria lo resucita, lo anima y lo convierte en nuestro contemporáneo”[3]. Killa lluqsimunpi takikuna huñusqaqa kaynam. Mawkayasqahina ñawpa yuyaykunam pukyukunapi chuyay chuyay yakuhina puqtimun, apu wamanikunapa, llapantin mayukunapa kallpanwan kallpachakuspa.

Tayta Inti, mama Killa, apu Qarwarasu, apu Salqantay, apu Pariaqaqa, Qurpuna llaqta, Chuqlluqucha yaku, Apurimaq mayu, chiwanway waytachakuna, kunturkuna, kukulikuna, Saramama, Aqsumama, hancha muchasqa Pachamama, tayta Arguedas, ñuqallayhina mitmaq runamasiykuna, qamkunaraykum Killa lluqsimun diskoqa.

 

Intipaq takikuna

 

“A través de INKARIO, Sylvia Falcón revitaliza el género de la Coloratura Andina y vuelve a poner en escena un repertorio que hará helar la sangre y bullir el corazón”. Academiapi amawtakunaqa, takiqkunaqa, “coloratura” taki ninkum ayllunchikkunapi harawiq warmikunapa takinkuta: trigopanpaypaq, trillapaq, kasarakuypaq, ima; kay takikunaqa mamakukunapa llanuchalla tuqyachisqan takikunam, qasqunku ukumantaraq lluqsimuspanmi wayrawan apasqahinalla chinkqarqun mallikunapa, mikuykunapa, runamasinchikkunapa sunqunta kusikuywan katatatachispa; utaqmi kanchiriq intihina llapa kawsaqkunata quriman qullqimanhina tikrachiwaspanchik llipipichiwanchik. Chayanallam Yma Sumac kuraq paninchikpa takinpas karqa. Paypa takinqa wayrakunapa, pisquchakunapa, uywakunapa sukankunatawan qaparikuynintam qatipallarqa, ayllukunapa yuyayninman mana yunpayta ratakuspan. Falconñataqmi, qipa takinkunapiqa ñawpachakunata aswan yuyarichiwanchik ( “Paras” videoclipta, uyaristin qawaykuna. Kay llamkaypiqa tinkuy nisqanchikmanta rimachwan: intipa kanchiriyninpas, sachakunapas, wayrakunapa sukakuynipas, llaqallasqa rumikunapi yuyaykunapas sumaqllatam tinkunku runatakiwan. Takiqpa ñawpa awaykuna pachanpas modernidad pachakunawan mana usuchinaskuspa tinkun; llinpiwanhina ichmasqa uyanpas sipaschakunapa munapaylla kanankupaq allichakuyninkuwanpas tinkusqam. Inkario dikopiqa hamuchkan Paras, Inkario, Kuntur kuntur, Amor indio, Montaña mía, Wifala, Tomasa, Huscarán, A mi palomita, Cholo traicionero, takikunachushinam (amalaya mana pantapaymanchu, chaynatam nin “Inkario”). Chaymi nini kay diskupiqa Intipaq takikunam. Imannasqa? Yaqa llapan takikunam (diskupa sutinmantaraq) Tawantinsuyuta yuyarichiwanchik, chaymantam tayta Intiwan yananchaykuna, inkakunapa taytanku kasqan rayku. Pacha paqarichiq intipa qurimanta kanchiriyninhina, mayupi qullqi challwakunapa llipipiyninhina takikunaqa aswan kallpachawaqninchikmi, runa kasqanchikta siminchik hunta riqsikunanchikpaq, mamanchikpa simintapas qimiykachasqa kasqanmanta hatarichinapaqmi. Kayna llamkaykunam wifalanchik, modernidad, posmodernidad pachakunapi ñawpa kayninchikta mana qunqachiwaspanchik takyachiwaqninchik.

Intipaq killapaq

Kay rakipiqa Daniel Kirwayotam yuyariyta munani. Ñuqallayqa Abancaypim, 2011 watapi riqsiykullarqani. Chay pachaqa karqa hatun huñunakuypi Taytanchik Arguedaspa, pachak wata paqarimusqanmanta rimanakuyni. Kay huñukay wichqanapaqmi Sylvia Falconqa takiykullarqa Daniel Kirwayopa guitarranwan yanapachikuspa. Makillantapas muchaykuymanmi karqa, saqillawananchikta yachaykullaspayqa. Sylviapawan tayta Kirwayopa llamkayninkum aswan sumaqta takyachin runakayniyta, chaymi Killa lluqsimun / Cuando sale la luna / diskupi takikunaqa kanchirichinku sapa punchaw kawsayniyta. Pisipaypipas, llakiypipas, aswan kusiypipas kay takikunaqa tulluytapas, sunquytapas kallpachankum. Tayta Daniel Kirwayuqa Intipaq, Killapaqchá kunanqa guitarranta waqachichkan; Chaska quyllurpa yupillanta qatispan. Chayna kachun amawta.

 

 

[1]Disko konpaktu (CD) Lima, 2007.

[2] Kay rakiqa paqarimurqa Atuqpa Chupan Riwistapi. Wata 1, yupay, 1. Lima, 2011-12. Pp.117-118. Chayta allichaykuspaymi kunanqa Hawansupi warkuchini.

[3]Octavio Paz. Los hijos del limo / Vuelta. Editorial Oveja negra, Colombia, 1985.

 

 

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s