AQUPAMPA QUYLLUR. Pablo Landeo

El wayki Pablo Landeo, fiel a su costumbre de abrir caminos a la escritura quechua,  privilegia a Hawansuyo con un fragmento de su novela Aqupanpa Quyllur. Este de seguro sera un hito, ya que se  trata de la primera novela escrita en quechua -sin traduccion- pero tambien ambientada en un ambiente urbano, como debe ser. Queda al amable  lector y a las intituciones pertinentes apoyar con fondos pro publicacion para este loable esfuerzo. Chaytaqa Luisa Taypewan konpanana.

pablo_landeo

AQUPAMPA QUYLLUR

Pablo Landeo

………………………………………………………………………………………………….

“Puente Atoconguman chayaykuspayqa mancharikurqanim Bolichera asiyenda chakrata qawaykuspay. Runakunapas achka-achkam sayachkasqaku, imaymana rimaykunata tinkuchispanku. ‘Achachallaw! Kaychika runakunaqa maymantataq lluqsirqamunku?’ nispaymi tapukullarqani asiyenda chakrapi wiñachkaqhina chukllachakunata qawaykuspay. Chayllapim, huk machucha, pisqupahina ñawichanwan qawaykuwaspan niwarqa: ‘Tukuy Limapi mana wasiyuqkuna, ñuqanchik wakchakunahinam huñunakuruspanku kay asiyenda chakrata hapikurqunku. Imaynanpitaq kaychika chakraqa huk runallapaq kanman, nispanku. Manas chaynallaqa lluqsinqakuchu. Kay chakrakuna saqinaykuta munaspankuqa siñoris gobirnuskuna huk lawman apawachunku. Ñuqaykupas wasiyuq kaytam munaniku, nispankus tiyallachkanku. Paqarin minchakunapaqqa aswanchá kanqa. Runakunaqa sisihinachá mirarqunqaku. Soldaduchakunapas wardiya sibilchakunapas hurquytaqa manachá atinqakuchu.’ Machuchaqa kaynata niwaspanmi runakunapa ukunpi chinkarqurqa. Chukllakunaqa istirakunallamantam kasqa ichaqa bandirachayuqkama. Chaymi llapa pampaqa pukawan yuraqwan pintasqahina rikurirqa. ‘Que bestiya karahu! Kay chakrakunapiqa saram chakichkarqaña, lliwchá saruparunku’, huk runa chaynata niykuptin ‘Panqallam karqa. Uywakuna mikunanpaq. Ñawpaq watakunapim ichaqa tarpuqku kaña de asukarta, utkuta, chaymantaqa yukata, kamotita. Surquillumantaraqmi taytaywan hamuq karqani llamkanaykupaq. Pachak, iskay pachak runakunam llamkaq karqaniku’, nispa huk machuniraq qawakuqpas rimaykurqa. Chaynalla sayaspa qawakuchkaptiykum Surquilluman riq chakra patallan karritirapi wardiyakuna rikuriramurqaku, chikankaray kawallukunapi sillakusqa. ‘Balakunapas tuqyanqachá. Inbasiyun ruwaqkunataqa sipinqakupaschá’ nispankum runakunaqa rimayta qallarirqaku, manchakustin. Wardiyakunaqa asiyenda wichqaqhinam muyururqaku chakra patallantakama, chaymantaqa muyusqankupi tuparuspankum chayllapi takyarurqaku. ‘Musuq inbasurkuna manaña yaykunankupaqchá’ niqta uyarirqani. ‘Yaykuytaqa atinqakuñachuqaya. Chakra ukupi runakunapas wichqasqañam kachkanku. Manachá atinqakuchu lluqsimuyta. Kaypiqa iskay, kimsallapas wañunqakum. Chikankaray wira-wira kawallukunapas inbasurkunapa wiksantaqa tuqyachinqakuchá, saruparunqakuchá’. Chayna rimachkaptillankum Patrón Santiago apostulkuna qawasqaytapas yuyariykurqani, mancharikuywan. Chayllapim Surquilluman riq karruchakunaqa qunqayllamanta rikurimurqaku. ‘Chayqaya karretirataqa kicharqamunkuña.’ nispankum Surquilluman riqkunaqa karrukunaman qispillarqaku. Ñuqallaypas kutikamullarqaniñam, achka runakunataraq saqiykamuspay. ‘Ñuqapas yachaspayqa chakra hapikuq yaykuyman karqa’ nikuspay”. Taytayqa chaynatam willakurqa.

………………………………………………………………………………………………….

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s