Yachaqpa kawsayninmanta Parqayawanpas. Wendy Milady Palomino

El breve  corpus de la  creación literaria de Wendy Milady Palomino va vislumbrando rasgos distintivos: La trasmisión del conocimiento de generación a generacióny   las tensiones entre generaciones en su relación al devenir  social  y a la naturaleza. En Parqaya, un bello diálogo de una muchacha con una vizcacha, en donde  ella ve el mismo cariño a sus seres queridos que tienen los humanos, hace que el animal sea liberado luego de ser capturado por el padre, recordándonos que por algo los animales y otros seres bellos y sagradas de la naturaleza son símbolos amatorios de la tradición quechua. Ya anteriormente Wendy Milady ha ganado Katatay I con ” Qam hina kayta munani”. Esperamos mas de Milady y de quienes como ella están dando mucho a la joven escritura creativa quechua  a partir de los programas de EIB, y la Beca 18.

 

Yachaqpa kawsaninmanta

Wata kinraykunapis huk qari warmachas isqun watayuqwan taytanwan mamanwanpas Lluqllasqa llaqtapi tiyasqa.Taytansi hatun allpayuqpa allpanpi llamkasqa, mamanñataqsi kamachiqninkunapaq chaypi yanusqa. Huk punchawsi taytan mamanpiwan chakranman risqaku. Kay chakraqa mayupa waqtanpi kasqa, chaypi llamkachkaptinku achka para chayaramusqa. Hinaptinsi mayuqa wiñayta qallaykamusqa chaysi taytanta mamantapas apakusqa. Chaymantapachas warmachaqa sapallanña hatun allpayuqpa allpanpi llamkaspa, waqcha kaspa tiyasqa.Hatun allpalluq kamachiq warmachataqa sapa punchaw supayta maqasqa. Warmachaqa llakisqa kawsasqa, mamanta taytanmantapas yuyarispan waqasqa. Chaypis pichqa watañas tiyasqa waynayarunankama.
​Huk punchawsi chay Lluqllasqa llaqtaman yachaqkuna chayaramusqaku. Paykunas sachakunawan chaymanta qurakunawan hampisqaku, kukawanpas qawayta yachasqaku. Chaysi waynaqa kusisqallaña yachaqkunapa hampisqankuta qawasqa, paypas yachaq kayta munasqa.Yachayta munaspansi yachaqkunapa kasqanman risqa, hinaptinsi llapan yachaqkuna waynataqa chaskisqaku. Chaymanta, llipinku llaqtata saqispanku Chalwanka llaqtaman ripusqaku. Waynachaqa imaynatam kukawan qawanku, hinallataq ima qurakunawan runata hampiytapas yacharullasqa.
Chaymantapachas waynaqa hampiyta yacharusqa kukawan hinallataq qurakunawan. Allin yachaq kananpaq karu llaqtakunapi purisqa, chaypis supayta qampiyta yacharamusqa. Hinaptinsi, Lluqllasqa llaqtamanta iskay chunka watamanta kutiramusqa, chaypis llipim ayllunkunata hampiyta qallarisqa.Chay punchawmantapachas achka runakuna riqsiyta qallaykusqaku. Llipinku payman qamuspanku qurakunawan hampichikusqaku hinallataq, kukawan qawachikusqaku. Sapa kutis pachamamaman mikunanta churapun pay hampiptin yanapananpaq, hinallataq kallpachayninta takyachinanpaq,chaymanta, allin runa kananpaq, achka wata kawsakunanpaq hinallataq lliw ayllukunata yanapananpaq
PARQAYA
Uchuy llaqtachapi, rumi wasichapi huk warmi warmachas Killari sutiyuqwan machutaytanwan kuska tiyasqaku. Kay warmachas sapa kutis machutaytanwan yantaman riyta kasqaku. Wasimanta lluqsinankupaq qallariyninpi asnukunataraq kawallutaraq sinchankunata hinaykuspanku yantaman rinku. Killari asnupi siyakuspa rin, machutaytanñataq kawallupi siyakuspa rin. Paykuna hatun yantakunata tarinankupaq mayukunapa patankunataraq rinku.
Huk puchaw kutimuspankuña Parqaya machaymanta waqtanpi purichkaptinku machutaytan nisqa:
– Yaw Killari kay machaypi achka wiskachakuna kachkan, hukchallatapas warakawan wañuchimusunchik kankaspa mikunanchikpaq.
Chayta nispa chay machutaytansi waychanmanta rumi warakawantin urquspa machayman qawarispa chay rumitas kachaykun. Hinaspa huk wiskachatas wiksanpis hapirqun, chaysi chay sallqa uywachaqa pampaman puytikurun. Hinaspa machuchaqa nin:
– Willkachayáy, utqayllata chay wiskachata hapiruy.
Ichaqa Killariqa pantakuspa hasillaña asnu qawanpi kachkasqa. Payqa chayraq wiskachakunata riqsisqa. Paypaq chay wiskachakunaqa allin sumaq sallqa uywachakuna kasqa, paykuna hasillaña tiyananku chay machaypi. Paykunapas wawanchankunata uywanku, paykunapas llakinku kusikunkupas tukuy imamantapas. Chayta qamutachkaptin machutaytanqa kayta nispa qaparirqa:
– Yaw warma, utqallay, hatarinqaña chay wiskachaqa. Riy, mana tutayachkaptinraq chay wiskachata uqarimuy
Mana munaspa, killari asnumanta uraykuspa wiskachaman waqaspa purisqa. Wiskachapa waqtanpi kachkantin sumaqchallata uqariykuspa waqastin sunqunllanpi nisqa:
– Riqchariy wiskachayáy aylluykiqa suyasuchkanki. Icha wawachaykikuna, icha churichaykikuna waqachkanku mana kutispaykirayku. ¡Riqchariy, riqchariy! mana kankapichu mikuyta munanichu.
Chayta nispansi, wiskachaqa warmapa sunqunta uyarispahina riqcharispas makinmanta pampaman pawaykuspa parqaya machaypa huk uchkuchaman yaykurqun. Hinaspa machu taytansi chayta qawaspa piñallaña nirqa:
– Imata rurarqunki, llanqañapas wiskataqa puñurachini. Qam warma waylakahina kanki yaw. Karu pachamanta kunankama wiskataqa mana hapirqanichu.
Machuchaqa tukuy imakunamanta rimapayaspa mana qawarachu willkachanta waqasqanta. Upayaptintaq chaypiña Killari waqasqanta uyarisqa. Hinaspa tapukusqa:
– Imamanta waqachkankiri?
– Rumi sunquyuq kanki machu taytáy, ima niwaqtaq ñuqa chinkakuptiy, waqankimanchu? Chay wiskachaqa ñuqanchikhina ayllun kachkan. Qam mikuykunata quwanki, ichapas paypas hukkuna wiskakunata mikuchimun. Nispa Killariqa kutichimusqa.
Machutaytansi kayta uyarispa waqayta qallarimusqa, hinaspa kawallumanta uraykusqa willkachanta rikranwan muyuruspa qasqunman apaykusqa nirqa:
– Pampachaway wawáy.
Chay punchawmanta iskayninku ruyru miski mikuykunata apanku parqaya machayman.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s